Azərbaycan Premyer Liqasının XXIX turunun “Qəbələ” – “Araz-Naxçıvan” oyunundan (1:1) sonra qonaq komandanın baş məşqçisi Andrey Demçenko jurnalistlərin suallarını cavablandırıb.

Prosport.Az xəbər verir ki, mütəxəssis əvvəlcə görüşlə bağlı fikirlərini bölüşüb.

– Oyunumuz alındı. Rəqibin sürətli əks-hücumlara üstünlük verdiyini bilirdik. İlk hissədə onları dəf etməyi bacardıq, şanslar da yaratdıq, amma qola çevirə bilmədik. Futbolda qayda budur ki, sən qol vura bilməsən, rəqib fərqlənir. Belə də oldu. Daha sonra hesabı bərabərləşdirə bildik. Futbolçuların texnikası oyunun taktikasını da qurur. Böyük futbol xırda detallardan ibarətdir. Bu məqamlarda isə pis olduq. Oyunun sonunda qələbə qolunu da vura bilərdik, alınmadı. Hücuma çıxanda müdafiədə boşluqlar yaranır. Matçın sonunda qalib gələ və ya uduza bilərdik.

– Komandada nələri dəyişə bilmisiniz?
– İlk olaraq, müasir futbolu aşılamaq istəyirdik. Yəni, topla daha yaxşı davranmağı bacaran komanda olmağa çalışdıq. Texnikalı və kompakt futbol lazımdır. Bu, özünəinam da yaradır. Amma ümumi baxanda, texniki bacarıqların bəzən kifayət qədər olmadığını görürük.

– Hansı mövqelərdə çatışmazlıqlar var?
– Komandanı mən qurmamışam. Bu heyətlə işləməyə çalışırıq.

– Avrokuboklara vəsiqə şanslarınızı necə dəyərləndirirsiniz?
– Turnir cədvəli göstərir ki, o qədər də yaxşı yerdə deyilik. Amma demək istəyirəm ki, hər oyun bir şans verir. Komanda futbol oynayanda xallar da gəlir. Bu, hələ bizdə alınmır.

– Mövsümün bitməsinə bir neçə tur qalıb. Yay transferləri üçün planlarınızı qurmusunuz?
– Bu haqda danışmaq tezdir. Müqaviləm yayda başa çatır. Qarşımıza avrokuboklara vəsiqə qazanmaq hədəfi qoyulub. Hələ işləməliyik.

– Komanda avrokuboklara vəsiqə qazana bilməzsə, məsuliyyətin nə qədərini özünüzə götürürsünüz?
– Məsuliyyəti üzərimə götürürəm. Gəmidəyəm və kapitanam. İstiqaməti mən seçirəm. Başqa nüanslar da var ki, işlərə mane törədir. Bütün nəticələrə görə məşqçi məsuliyyət daşıyır.