İsveçin "Malmö" klubunun hücumçusu Salifu Suma "Qarabağ"ın transfer gündəmindədir.

Prosport.Az yerli mətbuata istinadən xəbər verir ki, Ağdam klubu bu barədə 22 yaşlı futbolçunun həm özünü, həm də klubunu məlumatlandırıb.

Ağdamlılar qvineyalı ön xətt oyunçusunu ilk olaraq 1 illik icarəyə götürməyi planlaşdırır. Suma özünü doğruldacağı təqdirdə birdəfəlik transferi olunacaq.

Lakin “Malmö” rəhbərliyi buna müsbət yanaşmır. İsveçlilər hazırda Polşanın “Radomyak” klubunda icarə əsasında çıxış edən Sumanın birdəfəlik satışını üstün tutur. Bunun üçün isə “Zirə”yə ödədiyi məbləği – 1,3 milyon avronu tələb edir. Ancaq “Qarabağ” tərəfi oyunçunun son bir ildəki performansını nəzərə alaraq, məbləği yüksək hesab edir.

Salifu Sumanın fərqli ölkədə çıxışı da istisna edilmir. Çünki onunla başqa klublar da maraqlanır. Lakin digər komandalar da oyunçunun icarəyə götürülməsini üstün tutur.

Qeyd edək ki, Salifu Sumanın “Malmö” ilə müqavilə müddəti 2029-cu ilin yayına qədərdir.