Rusiyanın "Dinamo Moskva" klubunda çıxış edən azərbaycanəsilli futbolçu Ülvi Babayev milli komanda seçimi ilə bağlı müzakirələrə son qoyub.

Prosport.Az xəbər verir ki, gənc yarımmüdafiəçi myaç.ru-ya müsahibəsində Azərbaycan millisində oynama variantını düşünmədiyini bildirib.

Babayev qərarının dəyişmədiyini vurğulayaraq, Rusiya yığmasını seçdiyini deyib: "Bəli, hər şey doğrudur. Mən Rusiya millisinin seçimini etmişəm".

O, Rusiya millisinin beynəlxalq arenadakı təcrid vəziyyətinə baxmayaraq, bu qərarına görə peşman olmadığını da əlavə edib: "Xeyr, zərrə qədər də peşman deyiləm. Heç bir halda. Valeri Karpinin baş məşqçi olduğu yığma və Rusiya Futbol İttifaqından heç kiminlə bu mövzuda müzakirə aparmadan belə bir qərar qəbul etmişəm".

Babayevin sözlərinə görə, vətəndaşlığını dəyişmək və başqa yığmada oynamaq barədə heç vaxt düşünməyib: "Mən Ximkidə doğulmuşam və bütün həyatım Rusiyada keçib. Vətəndaşlığı dəyişmək fikrim olmayıb. Başqa ölkə yığmasını seçəcəyim halda, klubumda legioner sayılacağımı da düşünməmişəm. Atama, anama, ailəmə və yaxınlarıma hörmətlə yanaşıram. Amma mən Rusiyada böyümüşəm və seçim haqqımın olduğunu düşünürəm. Buna görə də Rusiya millisində dayanmışam".