Azərbaycan Premyer Liqasının XXVIII turunda keçirilən “Zirə” - “Neftçi” (1:1) matçının yan xətt hakimi Namiq Hüseynov qarşılaşmadan sonra gözlənilməz durumla qarşılaşıb.

Prosport.Az teleqraf.az-a istinadən xəbər verir ki, 43 yaşlı referinin avtomobilinə ziyan vurulub.

Belə ki, laynsman hakimlərin paltardəyişmə otağından ayrılıb stadionu tərk etmək istəyərkən avtomobilinin yad cisimlə cızıldığını görüb. Nəticədə o, xeyli ziyana düşüb.

Naməlum şəxslər tərəfindən atılan bu addımın matçda verilən qərarlarla əlaqədar olduğu ehtimal olunur.

Qeyd edək ki, sözügedən matçda “Neftçi” 1:0 öndə olsa da, 90+5-ci dəqiqədə meydan sahibləri hesabı bərabərləşdirib. “Neftçi” tərəfi və azarkeşlər “Zirə”nin cavab qolunda qayda pozuntusu olduğunu bildirərək hakimə etiraz edib. Nəticədə hakimin qərarına etiraz edən “Neftçi”nin baş məşqçisi Yuri Vernidub, köməkçisi Dmitro Kara Mustafa qarşısında qırmızı vərəqə görüb.