“Qarabağ”ın baş məşqçisi Qurban Qurbanov daha bir futbolçunu komandadan kənarlaşdırıb.

Prosport.Az sportinfo.az-a istinadən xəbər verir ki, Ağdam klubunun çalışdırıcısı Abbas Hüseynovdan sonra Elvin Cəfərquliyevin də "qələmini qırıb". O, müdafiəçini əvəzedici heyətə göndərib.

Bu qərarın arxasında bir səbəb dayanır - nizam-intizam qaydalarını pozma. Görəsən, onlar nə ediblər? Klubdan daxil olan informasiyaya görə, Qurbanov bundan öncə hər iki arxa xətt oyunçusuna bir neçə dəfə xəbərdarlıq edib.

Onlardan idmançı rejiminə riayət etmələrini, şəxsi həyatlarına diqqət yetirmələrini istəyib. Bununla yanaşı, getməli olmadıqları məkanlar barədə məlumatlandırılıblar.

Təcrübəli mütəxəssis “Şamaxı“ ilə Premyer Liqanın XXVII tur matçından sonra onlarla bağlı növbəti xoşagəlməz bilgi alıb. Baş məşqçiyə məlum olub ki, sözügedən cütlük əyləncə mərkəzlərindən birində vaxt keçirib. Elə bu da onun səbir kasasını daşırıb.

Daha öncə Sami Mmae eyni aqibəti yaşayıb. Səbəb Mərakeş kökənli belçikalı legionerin Çempionlar Liqasının pley-off mərhələsinin "Nyakasl"la Bakıda keçirilən ilk oyununun (1:6) fasiləsində etdiyi qeyri-peşəkar hərəkətdir.

Belə ki, Zaqreb "Dinamo"sundan icarəyə götürülmüş mərkəz müdafiəçisi müxtəlif bəhanələr gətirərək, 2-ci hissədə meydana çıxmaqdan boyun qaçırıb.