Millinin sabiq hücumçusu Ramil Şeydayevin "Qarabağ"ı tərk edəcəyi dəqiqləşib.

Prosport.Az sportinfo.az-a istinadən xəbər verir ki, bu mövsüm 3-cü dəfə Ağdam klubuna dönən, lakin əsas heyətə düşməyə çətinlik çəkən forvardla müqavilənin müddəti uzadılmayacaq.

30 yaşlı ön xətt oyunçusu Qurban Qurbanovun onunla bağlı nə düşünməsindən xəbərdardır.

1 ildən artıqdır ölkənin əsas yığmasına dəvət almayan Şeydayev "Qarabağ"dan getsə də, Premyer Liqada qala bilər.

Ona yeni müştəri çıxan var. Hazırda I Liqada turnir cədvəlinə başçılıq edən, elitaya vəsiqə qazanmağın 1 addımlığında olan "Şəfa" adıçəkilən hücumçunun xidmətində maraqlıdır.

Paytaxt təmsilçisi Premyer Liqada legionerlərdən istifadə etməyi düşünmür. Bu, klubun sponsorlarının qərarıdır. "Şəfa"nın heyətinin yalnız yerlilərdən formalaşdırılmasının tərəfdarıdırlar. Müvafiq göstəriş veriblər – planlar yalnız bu istiqamətdə qurulmalıdır.

"Şəfa"nın nümayəndələri artıq bir neçə azərbaycanlı oyunçu ilə görüşüb. "Araz-Naxçıvan"ın müdafiəçisi Rahil Məmmədov da onların arasındadır.

"Neftçi"nin yetirməsi "ağ-göylər"dən aylıq 20 min manat maaş tələb edib.