“Qarabağ” mövsümün sonunda 2 qapıçısı – Mateuş Koxalski və Fabian Buntiçlə vidalaşa bilər.

Prosport.Az futbolpress.az-a istinadən xəbər verir ki, polşalı qolkiper Koxalskiyə Avropanın TOP-5 Liqa klublarından maraq var. 25 yaşlı qapıçı Azərbaycan təmsilçisindən ayrılmağa müsbət yanaşır.

Buntiç isə oyun praktikasının azlığından narazıdır. 2024-cü ilin yayında heyətə cəlb olunan, ancaq gözləntiləri doğrultmayan qolkiper daha çox ehtiyatda qalır. Bu səbəbdən o, yayda klubunu dəyişmək niyyətindədir. Buntiçə ölkəsi Xorvatiyadan  maraq var.

Koxalski bu mövsüm 34, Buntiç isə 6 oyunda meydana çıxıb.

“Qarabağ” yayda heyətini ən azı 2 legioner qolkiperlə gücləndirmək niyyətindədir. Komandanın kapitanlarından Şahruddin Məhəmmədəliyevin tez-tez zədələnməsi bunu zəruri edir.

Daha əvvəl “İmişli”nin qapıçısı Andrey Sinenkanın “atlılar”ın diqqətində olduğu bildirilmişdi. “Qarabağ”ın maraqlandığı digər qolkiper isə “Şamaxı”dan Rikardo Fernandesdir. Sinenkanın müqaviləsi yayda bitir. Rikardonun isə “Şamaxı”yla sözləşməsi 2027-ci ilin yayına kimidir.