Portuqaliya Futbol Federasiyası (FPF) Azərbaycan millisinin sabiq baş məşqçisi Fernandu Santuşla bağlı müqavilə məsələsinə görə Sosial Təhlükəsizlik qurumuna əlavə 700 min avro ödəyib.

Prosport.Az yerli mətbuata istinadən xəbər verir ki, bununla ümumi ödəniş məbləği təxminən 3,3 milyon avroya çatıb.

Maraqlıdır ki, bu ilin yanvarında Sosial Təhlükəsizlik qurumunun bildirişindən sonra FPF qərara alıb ki, məhkəməyə müraciət etməsin və 2021-ci ilin dekabrından 2022-ci ilin dekabrına qədər olan dövr üçün ödənilməmiş hesab edilən sosial sığorta haqlarına görə 2,6 milyon avro ödəsin. Lakin həmin vaxt gecikmə faizləri və bəzi cərimələr hesablanmamışdı. Yeni ödənişlə birlikdə ümumi məbləğ 3,3 milyon avroya yüksəlib. Yekun məbləğin bundan da artıq ola biləcəyi istisna edilmir.

Məsələ Fernandu Santuşun Portuqaliya yığmasını çalışdırarkən “Femacosa” adlı şirkət vasitəsilə ödənişini etməsi ilə bağlıdır. Bu şirkət 2014-cü ildə yaradılıb və məşqçi ilə texniki heyətin ödənişləri bu model üzərindən həyata keçirilib.

Hazırda federasiyaya rəhbərlik edən Pedro Proença bildirib ki, məhkəməni udmaq şanslarının az və xərclərinin çox olması ucbatından borcun dərhal ödənilməsinə qərar verilib.

Qeyd edək ki, Fernandu Santuş Portuqaliya millisinin baş məşqçisi kimi 2016-cı ildə Avropa çempionluğunu və 2019-cu ildə Millətlər Liqasını qazanıb. O, son olaraq 2024-cü ilin yayından ötən ilin sentyabrına qədər Azərbaycan yığmasını çalışdırıb.