AFFA növbəti mövsüm öncəsi Əvəzedicilər Liqasının taleyi ilə bağlı məsələni gündəmə çıxarıb.

Prosport.Az-ın əldə etdiyi xəbərə görə, artıq Premyer Liqa klublarından bununla bağlı fikirlər də öyrənilib.

AFFA klublar qarşısında 2 seçim imkanı buraxıb: 

1. Əvəzedicilər Liqası qalsın, bu dəfə 10 yox, 12 komanda iştirak etsin və ilk 3 komanda mükafatlandırılsın.

2. 4 komanda I Liqada, 8 komanda II Liqada mübarizə aparsın. Əvəzedicilər Liqasında cari mövsümün hazırkı durumuna görə, ilk "4-lük" – "Sabah", "Neftçi", "Zirə" və "Qəbələ" növbəti mövsüm I Liqada, son 5-10-cu yerlərin sahibləri – "Qarabağ", "Sumqayıt", "Turan Tovuz", "Şamaxı", "Kəpəz" və "Araz-Naxçıvan", eləcə də Əvəzedicilər Liqasında çıxış etməyən "İmişli" və "Karvan-Yevlax" II Liqada çıxış etsin.

2-ci variantdan imtina edən klublar üçün uşaq futboluna 500 min manatın əvəzinə, 700 min manat yatırım etmək tapşırılır.

"Qarabağ" və "Araz-Naxçıvan" 1-ci variantın lehinə səs verib. "Sabah" və "Zirə" neytral qalıb. Digər 8 klub isə 2-ci varianta razılıq verib.

Göründüyü kimi, çoxluq 2-ci varianta üstünlük verib. Bu isə o deməkdir ki, növbəti mövsüm Əvəzedicilər Liqası ləğv ediləcək və klubların "dubl"ları artıq I və II Liqalarda mübarizə aparacaq. Həmçinin, buradan belə aydın olur ki, növbəti mövsüm I Liqa və II Liqada komandaların sayı artırılacaq. I Liqadakı əvəzedici komandalar sadəcə titul üçün oynayacaqsa, II Liqa əvəzediciləri I Liqaya çıxmaq üçün mübarizə aparacaq.

Səbuhi Musa