Azərbaycan Premyer Liqasının XXVII turunun “Turan Tovuz” – “Sumqayıt” oyunundan (2:1) sonra meydan sahibi komandanın baş məşqçisi Qurban Berdiyev jurnalistlərin suallarını cavablandırıb.

Prosport.Az xəbər verir ki, mütəxəssis əvvəlcə görüşlə bağlı fikirlərini bölüşüb.

– Vacib və lazımlı qələbə qazandıq. Oyundan əvvəl uşaqlarda həyəcan var idi. Şükür ki, qalib gəldik.

– 2-ci hissədə oyununuzun alınmaması nə ilə bağlı idi? 2:0-dan sonra arxayınlıq yarandı? 
– 2:0-dan sonra çalışdıq ki, hesabı qoruyaq. Buna görə müdafiəyə çəkildik.

– Ot örtüyünün vəziyyəti necədir?
– Ot örtüyü çox yaxşı idi. Ümid edirik ki, həmişə belə qalar. Klubun prezidentinə təşəkkür edirik ki, bu cür şərait yaradıb.

– Əliyar Ağayev bu oyuna təyinat alsaydı, etiraz edərdiniz?
– Hakimləri tanımıram. Təyinat alsaydı da, oynamalıydıq.

– Bu heyət avrokuboklarda oynamağa neçə faiz hazırdır?
– Nəsə demək çətindir. Heyətin möhkəmlənməsinə ehtiyac var. Avrokuboklara düşəcəyimiz hələ bəlli deyil. İndidən avrokuboklardan danışırıq, amma hələ ora çatmamışıq.

– Avrokuboklara düşsəniz, oyunlar Tovuzda olacaq?
– Əlbəttə. Bizim şəhərimiz, meydanımızdır.

– Müqaviləniz mövsümün sonuna kimidir. Uzatmaq istəyirsiniz?
– Klubdaxili məsələdir.