Azərbaycan Premyer Liqasının XXVII turu çərçivəsində “Neftçi” öz meydanında “Araz-Naxçıvan”ı 2:1 hesabı ilə məğlub edib.

Prosport.Az xəbər verir ki, oyundan sonra keçirilən mətbuat konfransında qonaqların məşqçisi Vadar Nuriyev oyunla bağlı təəssüratlarını bölüşüb.

– Oyuna yaxşı hazırlaşmışdıq, final kimi yanaşırdıq, qələbə qazanmaq istəyirdik. 1-ci hissədə “Neftçi” yaxşı oynadı, 2-ci hissədə biz. Əvəzetmələrdən sonra vəziyyəti düzəltdik, qol da vurduq. Cinah oyunçularımız olmadığı üçün məcburi mövqe dəyişikliyinə getmişdik. Öz mövqeyində oynamayan futbolçular üçün matç çətin alındı. Ümumilikdə komandadan 2-ci hissədə razı qaldıq.

– Dediniz ki, qarşılaşmaya final kimi baxırdıq, bu məğlubiyyətlə qatarın getdiyini demək olar?

– Deməzdim. Qarşıda hələ 6 oyun var. Hələ avrokuboklardan tam qopduğumuzu demək olmaz.

– İlk hissədə “Araz-Naxçıvan” çox zəif oyun göstərdi, hətta deyə bilərik ki, bəxtiniz gətirməsəydi, hesab daha böyük ola bilərdi…

– Cinah oyunçularımız öz mövqelərində oynamırdılar. Bu vəziyyətin yaranacağını ehtimal etmirdik, amma oldu. Əsas futbolçularımız zədəlidir, məsələn, Bruno olsaydı, tam fərqli futbol oynayacaqdıq.

– Amma Slavik Alxasov var idi, sonradan meydana daxil oldu, Paronun da bu mövqedə ilk oyunu deyildi, “Karvan-Yevlax”la görüşdə sağ cinah müdafiəçisi kimi çıxış etmişdi.

– “Karvan-Yevlax”la “Neftçi”ni bir hesab etməyək, onların daha keyfiyyətli futbolçuları var.