Avrokuboklara iddialı olan "Neftçi" Misli Premyer Liqasının XXVII turunda "Araz-Naxçıvan"a qalib gəlib.

Prosport.Az xəbər verir ki, "Palms Sports Arena"da baş tutan matç ev sahiblərinin 2:1 hesablı qələbəsi ilə yekunlaşıb. Bu, Bakı klubunun ardıcıl 4-cü qələbəsidir.

"Ağ-qaralar"ın heyətində İmad Faraj (32) və Breno Almeyda (57) fərqləniblər. Qonaq komandada isə Slavik Alxasov (65) dəqiq zərbə müəllifi olub.

Avrokubok zonasındakı əsas rəqibi "Zirə"nin xal itirməsindən (44 xal) yararlanan "Neftçi" 43 xalla 5-cidir. "Araz-Naxçıvan" isə 39 xalla 6-cı sırada yer alıb.

Qeyd edək ki, turun əvvəlki oyunlarında "Karvan-Yevlax" "Kəpəz"i (4:1) məğlub edib. "Şamaxı" - "Qarabağ" (0:0) və "Sabah" - "Zirə" (2:2) matçlarında isə qalib müəyyənləşməyib.