"Şamaxı" Azərbaycan Premyer Liqasının XXVI turunda səfərdə "Zirə" ilə 1:1 hesablı heç-heçə edib.

Prosport.Az xəbər verir ki, bölgə təmsilçisinin baş məşqçisi Ayxan Abbasov matçdan sonra keçirilən mətbuat konfransında jurnalistlərin suallarını cavablandırıb:

– Maraqlı və gərgin oyun oldu. İlk hissədə taktiki savaş getdi. Təəssüf ki, Dioqu Balau fürsətdən istifadə etmədi. Bilirdik ki, fasilədən sonra rəqib dəyişiklik edəcək. İlk dəqiqələrdən qırmızı vərəqə almağımız bizi çətin duruma saldı. Qol buraxdıqdan sonra da komanda dağılmadı, sona qədər şansımızı saxladıq. Bir çox oyunlarda bu çatmırdı, qol buraxdıqdan sonra dağılmışıq, 2-ci qolu buraxmışıq. 10 nəfərlə "Zirə" kimi komandadan xal almaq uğurdur. Bu mövsüm "Şamaxı" boyundan yuxarı tullandı. İstəyimiz budur ki, futbolçular sona qədər mübarizə aparsın. Rəqibi də təbrik edirəm, 1 xal qazandılar.

– Dioqu Balauya çox əsəbiləşdiniz. Günah onda idi?
– Nəyə əsəbiləşdim? Topu qəbul etdikdən sonra bu səhvləri edirdi. İrəliyə oynamaq istəyirdi. İlk hissədə də öz tərəfimizdə elə səhv etmişdi. Üzücü hal odur ki, gələn oyun üçün itkilərimiz çoxdur.

– Qarşıdakı turda cəzalılarınız çox olacaq...
– Kərim Rossi, Dioqu Balau və mən də cəzalıyam. Sizinlə danışa-danışa fikirləşirik ki, növbəti oyun üçün 11 nəfər tapaq.