"Ötənilki uğuru təkrarladığımız üçün şadam. Qorxurdum ki, məndə alınmayacaq. Amma hər şey əksinə oldu və komanda hesabında 1-ci yeri tutduq".

Prosport.Az xəbər verir ki, bunu bunu Xorvatiyanın paytaxtı Zaqrebdə komanda hesabında Avropa çempionu olan sərbəst güləş üzrə Azərbaycan millisinin baş məşqçisi Xetaq Qozyumov Heydər Əliyev Beynəlxalq Aeroportunda jurnalistlərə açıqlamasında deyib.

3 gün sonra 40 yaşını tamamlayacaq osetin mütəxəssis Zaqrebdə qazanılan nəticədən razı qaldığını söyləyib: "Daha çox qızıl medal götürmək istəyərdik. 4 idmançımız finala çıxmışdı. Bəzi güləşçilərimiz zədəli idi. Onlar sağlam olsaydılar, daha fərqli nəticəyə imza atardıq. Təəssüf ki, 92 kq-da Osman Nurməhəmmədov, 97 kq-da Məhəmmədxan Məhəmmədov finalda uduzdular. Onlara ümidlərimiz böyük idi".

Baş məşqçi qarşıdakı planları da açıqlayıb: "1 həftə dincəldikdən sonra Bakıda toplaşıb dünya çempionatının hazırlıqlarına başlayacağıq. Bizi bir neçə hazırlıq mərhələsi gözləyir. Bir neçə beynəlxalq turnirdə iştirak edəcəyik. Bir sözlə, Paris Olimpiadasına lisenziya verən mundiala ciddi hazırlaşacağıq".

Qeyd edək ki, sərbəst güləş üzrə Azərbaycan millisi 2 qızıl, 2 gümüş və 2 bürünc medalla komanda hesabında 4-cü dəfə Avropa çempionu olub.