"Turan Tovuz" Azərbaycan Kuboku yarımfinal mərhələsinin ilk oyununda Mehdi Hüseynzadə adına Sumqayıt şəhər stadionunda "Zirə"yə 0:2 hesabı ilə uduzub.

Prosport.Az xəbər verir ki, Qərb bölgəsi təmsilçisinin məşqçisi Yunis Hüseynov matçdan sonra keçirilən mətbuat konfransında jurnalistlərin suallarını cavablandırıb.

– Hər komanda Kubok oyununda qalib gəlmək istəyir. Avrokuboklara getmək Kubokdan daha rahatdır. 2-3 oyunda qələbə qazanandan sonra finala çıxırsan. Bu gün qalib gəlmək istəyirdik. Hələ cavab matçı var. Tam ciddi hazırlaşıb finala vəsiqə qazanmağa çalışacağıq. Bu gün öz səhvlərimizdən qollar buraxdıq. Rəqib əks-hücumda oynayırdı. Qarşıda "İmişli" ilə çətin çempionat oyunu var. Həmin görüşə hazırlaşacağıq. "Zirə" ilə cavab oyununda tam başqa futbol oynayacağıq.

– Klub prezidenti Ehtiram Quliyev hakimlik haqda sərt fikirlər səsləndirdi. Sizin fikriniz necədir?
– Hakimlər haqda danışmaq istəmirik. Danışanda bizi cərimələyirlər. Epizoda biz də baxdıq. Nə dərəcədə penalti olmadığını deyə bilmərəm. 2-ci hissədə rəqib Roderik Millerin ayağını tapdaladı. Mənə elə gəlir ki, VAR epizoda baxmalı idi. Əliyar Ağayev görməyə bilər. Amma məncə, VAR baş hakimi monitora dəvət etməli idi.

– İbrahima Vadji nə vaxt qol vuracaq?
– Biz də istəyirik ki, qol vursun. İnşallah qarşıdakı matçlarda fərqlənər. Futbolçu elədir ki, 1 qol vurandan sonra onda özünəinam artır. Vadji də 1 qol vursa, davamı gələr.