"Zirə" Azərbaycan Kubokunun yarımfinal mərhələsinin ilk oyununda səfərdə "Turan Tovuz"u 2:0 hesabı ilə məğlub edib.
Prosport.Az xəbər verir ki, "qartallar"ın baş məşqçisi Rəşad Sadıqov matçdan sonra keçirilən mətbuat konfransında jurnalistlərin suallarını cavablandırıb.
– Hər zaman Kubokun ilk oyunlarında taktiki savaş gedir. 1-ci hissədə bunun şahidi olduq. Rəqibin çoxsaylı standart vəziyyətləri var idi. Hamımız bilirik ki, "Turan Tovuz" standart vəziyyətlərdə ən təhlükəli komandalardan biridir. 2-ci hissədə sürəti bir az artırdıq. Bizim üçün olduqca vacib olan qələbə qazandıq. Hələ ilk hissəni oynadıq. Bizi qarşıda vacib 2-ci yarı gözləyir.
– Cütün taleyinin həll olunduğunu demək olar?
– Qətiyyən yox. Rəqibin fərqlənmək üçün çoxlu "silahlar"ı var. Hansı hesab qeydə alınsaydı da, eyni fikirdə olacaqdım. Tez bir zamanda çempionat oyununa köklənməliyik.
– Mövsüm ərzində zədələr olmasaydı, "Zirə"nin nəticələri fərqli ola bilərdi?
– Zədə və cəza baxımından ən çox problem yaşayan komandalardanıq. Bəzən də olur ki, tam heyətlə çıxıb nəticə əldə etmək olmur. Hamının formada olması bizə üstünlük verir.
– Anje Mutsinzinin start heyətində olmamasının səbəbi nədir?
– Uzun səfərdən gəlib. Sabah ona yüngül məşq verib sonra 1 günlük istirahət verəcəyik.
– Daha böyük büdcə ilə daha böyük işlər görə bilərsiniz? "Zirə"də qalmaqla sanki böyük uğurlar əldə etmək çətin görünür...
– "Zirə"də xoşbəxtəm. Rəhbərliyimiz mənə hər zaman şərait yaradıb. Onlara təşəkkür edirəm. Yüksək liqada təcrübəm olmadığı halda mənə güvəndilər. Bütün məşqçilər daha böyük büdcə, yaxşı şərait istəyər. Amma büdcə hər şey deyil. Elə ola bilər ki, böyük büdcə ilə heç ilk "5-liy"ə düşə bilmərəm. Futbolun hər cür tərəfi var. Bu gün şükür edirəm ki, "Zirə"nin baş məşqçisiyəm. Uğurlu nəticə qazanmaq üçün əlimizdən gələni edəcəyik.
– Növbəti oyunlarda Leroy-Jak Mikelsi start heyətində oynatmağı düşünürsünüz?
– Mikels son vaxtlarda zədə aldı. Qış fasiləsindən sonra günü-gündən yaxşı formaya düşürdü. "Kəpəz"lə matça start heyətində başladı. Mikelsi oynatmaq istəyirəm. Qarşıdakı oyunlarda start heyətində başlamaq ehtimalı yüksəkdir. Sadəcə olaraq hücum xəttində rəqabət var.
– Finalda rəqibin kim olmasını istəyərdiniz?
– Bu suala cavab vermək istəmirəm. Hazırda cavab oyununda "Turan Tovuz"un qarşısını necə alacağımızı fikirləşirəm. Bu gün hesab 3:0 olsaydı da mən rahatlaşmayacaqdım. "Turan Tovuz"un hücum potensialı fərqlidir. Rəqibi nəzərə alsaq, finala çıxdığımızı düşünmürəm.