"Görüşü evdə televiziyadan izlədim. Çox maraqlı matç alındı".

Bu sözləri Prosport.Az-a "Xəzər Lənkəran", "Neftçi”nin və Syerra-Leone millisinin sabiq futbolçusu Culius Vobay “FIFA Series-2026”  turniri çərçivəsində ölkəsinin yığmasının Azərbaycan millisi ilə keçirdiyi oyun barədə danışarkən deyib.

O bildirib ki, qarşılaşma hər iki komanda üçün faydalı təcrübə olub: "Xüsusilə də bu matç Syerra-Leone millisində məşqçinin yoxlamaq istədiyi yeni oyunçular baxımından önəmli idi. Bu futbolçuların komandanın sisteminə uyğunlaşıb-uyğunlaşmadığını görmək üçün yaxşı imkan yarandı”.

Veteran futbolçu əlavə edib ki, qarşılaşmanın əsas vaxtının nəticəsi ədalətli olub: “Hesab edirəm ki, hər iki komanda göstərdiyi oyuna görə istədiyini əldə etdi".

Xatırladaq ki, Azərbaycan seçməsi əsas vaxtı heç-heçə (1:1) ilə bitən oyunda rəqibini penaltilər seriyasında 9:8 hesabı ilə məğlub edərək ilk dəfə beynəlxalq turnirin qalibi olub.

Qeyd edək ki, Culius Vobay 2011-ci ildə “Xəzər Lənkəran”, 2012-2015-ci illərdə  isə “Neftçi”də çıxış edib.