"Qarabağ" daha bir legioneri ilə vidalaşmağa razıdır.

Prosport.Az sportinfo.az-a istinadən xəbər verir ki, yaxınlarda Kris Kuakunun “Sarpsborq"a (Norveç) keçidinə şərait yaradan Ağdam təmsilçisi bu dəfə Leandro Andradenin gedişinə hazırlıq görür.

"Köhlən atlar" 2021-ci ildən bu formanı geyinən kabe-verdeliyə görə gələcək təklifləri nəzərdən keçirməyə hazırdır.

Qurban Qurbanov bir neçə aydır ideal formada olmayan, ötən müddətdə Azərbaycandan ayrılmaq istəyini dəfələrlə dilə gətirmiş futbolçunu satmağın tərəfdarıdır.

"Qarabağ" onu bu yay satmaqla böyük miqdarda pul qazanmaq istəyindədir. Çünki 26 yaşlı əcnəbinin müqaviləsinin müddəti 2027-ci ilin yayına qədər qüvvədədir.

Azərbaycan çempionu Andradeyə qoyduğu transfer qiyməti kifayət qədər normaldır. 3 milyon avro ödəyən olsa, keçid baş tutacaq.

Müştərilər? Onlar əvvəl də olub, indi də var. Səudiyyə Ərəbistanı, Qətər, Çin, Rusiya və bəzi Avropa ölkələrindən ona maraq göstərənlər çoxdur.

Cari mövsüm 41 matça çıxan Andrade 12 qol və 9 məhsuldar ötürmə ilə yadda qalıb. "Transfermarkt" portalı sözügedən oyunçunun transfer qiymətini 3 milyon avro dəyərləndirir.