Azər Bağırov yenidən "Araz-Naxçıvan"a qayıda bilər.

Prosport.Az xəbər verir ki, bu barədə sportinfo.az-a Muxtar Respublika təmsilçisindən məlumat daxil olub.

Bildirilib ki, Zaur Axundov klubu maliyyələşdirməyə davam edərsə, Andrey Demçenko cari mövsümün sonunda baş məşqçi postunu tərk edəcək.

Çünki Naxçıvan Futbol Federasiyasının (NFF) prezidenti bu ilin yanvarında komandanın sükanı arxasına gətirdiyi ukraynalı çalışdırıcının işindən və əldə etdiyi nəticələrdən narazıdır.

Axundovun fikrincə, tarixinin ən böyük büdcəsiylə sezona başlayan "Araz-Naxçıvan" avrokuboklara vəsiqə qazanmalıdır. Hələlik isə işlər tam qaydasında getmir.

Ölkə kubokunda mübarizəni 1/8 final mərhələsində dayandıran "ağ-qırmızılar" 25 turdan sonra Premyer Liqada turnir cədvəlinin 5-ci sırasında yer alır.

NFF-nın birinci şəxsi klubla əlaqələrini kəsməsə, Bağırovu təkrar geri qaytarmağı planlaşdırır.

O, 2024-cü ilin martında buradan istefaya göndərdiyi çalışdırıcı haqda son vaxtlar dəfələrlə müsbət fikirlər səsləndirib, həm Andrey Demçenkodan, həm də Elmar Baxşıyevdən yaxşı mütəxəssis olduğunu söyləyib.

Azər Bağırov hazırda "Kəpəz"in sükanı arxasındadır. 2022-2024-cü illər aralığında "Araz-Naxçıvan"da işləmiş məşqçinin Gəncə təmsilçisi ilə müqaviləsi 2027-cı ilin yayınadək qüvvədədir.