Portuqaliyanın U-21 millisinin baş məşqçisi Luis Freyre Avropa çempionatının seçmə mərhələsində Azərbaycan və Şotlandiya ilə keçirilən oyunları dəyərləndirib.

Prosport.Az xəbər verir ki, 40 yaşlı mütəxəssis hər 2 matçda üzləşdikləri çətinliklərdən danışıb.

O, millimizlə qarşılaşmanı şotlandlarla görüşdən fərqləndirib: “Bizim özünəməxsus oyun üslubumuz var və əsas diqqətimiz buna yönəlib. Şotlandiyanın Azərbaycandan fərqli problemlər yaradacağını gözləyirdik. Çünki Bakıya uzun səfərin ardından şotlandlarla matçda çətinlik çəkəcəyimizi düşünürdük. Həm Azərbaycan, həm də Şotlandiya ilə görüşdə nə etməli olduğumuzu bilirdik və istədiyimiz qədər qol vurduq, həmçinin qapımızı toxunulmaz saxladıq. Açığı, Azərbaycanla qarşılaşmada rəqib bizi daha çox əziyyətə saldı. Xüsusən də birinci hissədə müdafiəni yarmaq üçün çox əziyyət çəkdik. Şotlandiya ilə qarşılaşmada isə bunun əksi yaşandı, birinci hissədə hər şey istədiyimizdən də yaxşı alındı”.

Qeyd edək ki, Azərbaycanı 4:0, Şotlandiyanı isə 3:0 hesabı ilə məğlub edən Portuqaliyanın U-21 yığması B qrupunda 19 xalla turnir cədvəlinə başçılıq edir.