Naxçıvan Futbol Federasiyasının (NFF) prezidenti Zaur Axundov "Araz-Naxçıvan"ın futbolçularını bağışlayıb.

Prosport.Az sportinfo.az-a istinadən xəbər verir ki, NFF-nın 1-ci şəxsi 1000 dollar cərimə qərarını artıq dəyişdirib.

Səbəb komandanın Premyer Liqanın son 2 turunda "Karvan"a Mərdəkanda 2:1, "Şamaxı"ya isə səfərdə 1:0 hesabı ilə qalib gəlməsidir. "Ağ-qırmızılar" 25 tura 39 xal toplayıb və turnir cədvəlinin 5-ci pilləsində yerləşib.

4-cü sıradakı "Zirə"dən 3 xal geri qalan muxtar respublika təmsilçisi hələ də avrokuboklara vəsiqə qazanmaq şansını özündə saxlayıb. 1000 dollar cərimə barədə qərar "Qarabağ"la matçdan sonra verilib.

Premyer Liqanın XXIII tur matçında "köhlən atlar"a 0:6 hesablı məğlubiyyətdən sonra baş məşqçi Andrey Demçenko rəhbər şəxsin hər bir futbolçuya cərimə kəsməsini mediaya açıqlamışdı.