“Baku Sportinq” I Liqanın XX turunda “Səbail”lə baş tutacaq oyunun hazırlıqlarını davam etdirir.

Prosport.Az sportinfo.az-a istinadən xəbər verir ki, baş məşqçi Röyal Nəcəfov Bayıl təmsilçisi ilə görüş öncəsi maraqlı addımla yadda qalıb.

Gənc mütəxssis klubun U-14 komandasının istedadlı futbolçusu Rüfət Həsənovu əsas komandanın məşqlərinə cəlb edib.

AFFA U-14 Liqasının Bakı zonasından pley-off mərhələsinə çıxmaq uğrunda mübarizə aparan “Baku Sportinq”in aparıcı yarımmüdafiəçisinin aktivində bu mövsüm 22 qol, 10 assist var.

Ardıcıl 2 mövsümdür AFFA uşaq liqalarında bombardir olan vunderkind təkcə əsas komandanın məşqçilər korpusunun diqqət mərkəzində deyil. Onun xidmətində İtaliyanın "Sassuolo" klubu başda olmaqla bir neçə Avropa təmsilçisi maraqlıdır.

İtaliyanlarla ilkin danışıqlar da baş tutub. Amma sənəd problemi ilə bağlı hələki Rüfətin Avropaya üz tutması gecikir.