"Sabah" müdafiəçisi Tımoteuş Puxaçla bağlı qərarını verib.

Prosport.Az Polşa mətbuatına istinadən xəbər verir ki, Bakı klubu sol cinah oyunçusunu birdəfəlik transfer etmək niyyətindədir.

Mövsümün əvvəlində Almaniyanın “Holştayn” klubundan 1 illik icarəyə götürülən 27 yaşlı futbolçunun parlaq performansı “Sabah” rəhbərliyinin diqqətini çəkib. Bu mövsüm Premyer Liqanın 23 oyununda 9 məhsuldar ötürmə verən Puxaçın birdəfəlik transferi ilə bağlı klublar arasında danışıqlara start verilib.

Futbolçu özü ölkəmizdə qalmaqda maraqlıdır. Puxaç “Sabah”ın heyətində avrokuboklarda çıxış edərək Polşa millisinə dəvət alacağını və orada möhkəmlənəcəyini düşünür.

“Holştayn”la “Sabah” arasındakı icarə müqaviləsində oyunçunun 600 min avro müqabilində birdəfəlik satılma bəndi var. Ancaq Premyer Liqamızın lideri məbləği aşağı salmaq üçün almanlarla danışıq aparır. Tərəflərin tezliklə ortaq məxrəcə gəlməsi və Puxaçın “Sabah”la uzunmüddətli müqavilə imzalaması gözlənilir.

Qeyd edək ki, Tımoteuş Puxaç 2021-2024-cü illərdə Polşa millisinin heyətində 15 oyun keçirib.