Naxçıvan Futbol Federasiyasının (NFF) prezidenti Zaur Axundov "Araz-Naxçıvan"ın məşqçi və futbolçularına xəbərdarlıq edib.

Prosport.Az sportinfo.az-a istinadən xəbər verir ki, xəbərdarlığa əsasən, əgər komanda cari mövsümün sonunda avrokuboklara vəsiqə qazana bilməsə, o, "ağ-qırmızılar"a maliyyə dəstəyini dayandıracaq.

NFF-nin 1-ci şəxsinin adından kollektiv üzvlərinə bu barədə məlumat verilib. Bildirilib ki, bu sezon kluba Axundovdan savayı maddi kömək edən yoxdur.

Naxçıvan bölgəsindən olan bir sıra biznesmen yardım göstərəcəklərinə söz versə də, məsələ sözdən işə keçən əsnada onların hamısı tək qalıb. Axundov isə belə vəziyyətdə bütün yükü öz üzərinə çəkmək niyyətindən uzaqdır.

Muxtar respublika təmsilçisi ölkə kubokunda mübarizəni 1/8 final mərhələsində dayandırıb. "Araz-Naxçıvan"ın ötən yay olduğu kimi, bu il qitə arenasına çıxmasının tək yolu Premyer Liqadan keçir.