ABŞ-nin "Kolambus Kru" klubunun baş məşqçisi Henrik Ridströmün Nəriman Axundzadədən gözləntiləri böyükdür.

Prosport.Az xəbər verir ki, isveçli mütəxəssis bu barədə Kanadanın "Toronto" klubu ilə oyundan sonra deyib.

Baş məşqçi heyətdəki rəqabəti gücləndirməyin vacibliyini vurğulayıb: "Bizim toparlanmaq, yaralarımızı sarımaq və bir araya gəlmək üçün vaxtımız var, lakin bunun üçün daha çox rəqabət lazımdır. Hazırda meydanda həddindən artıq çəkingən davranırıq. Ümid edirəm ki, Andre Qomeş və Nəriman Axundzadə kimi komandaya yeni qoşulan futbolçular rəqabəti artırmaq üçün səviyyəmizi yüksəldə biləcək. Onların gəlişi ilə daha ciddi mübarizə aparmağımız çox vacibdir".

Qeyd edək ki, Nəriman Axundzadə sözügedən qarşılaşmanın 88-ci dəqiqəsində meydana daxil olaraq MLS-də çıxış edən ilk azərbaycanlı futbolçu kimi tarixə düşüb. Qarşılaşma "Toronto"nun 2:1 hesablı qələbəsi ilə başa çatıb.