"Quba" futbol komandası II Liqanın XIX turunda autsayder "Araz-Saatlı" ilə oyuna çıxmaya bilər.

Prosport.Az xəbər verir ki, buna səbəb komandanın yol xərclərini qarşılaya bilməməsidir.

Qubanın eyniadlı təmsilçisi məsələ ilə bağlı sosial şəbəkə hesabında məlumat paylaşıb:

"Sabah "Araz-Saatlı" ilə oyuna çıxmalı idik. Amma açıq deyək, bu oyuna çıxmağımız ciddi sual altındadır. Səbəb hamıya bəllidir…

Yol xərclərini qarşılaya bilmirik, komandanın elementar ehtiyaclarını ödəməkdə çətinlik çəkirik. Uşaqlar aylarla əziyyət çəkdi, çoxu heç nə gözləmədən oynadı. Sadəcə Quba üçün, bu komandanın adı üçün.

Hamı oyuna çıxmaq istəyir. Hamı döyüşmək istəyir. Amma bəzən istəmək kifayət etmir...

Biz bu vəziyyətə gəlib çıxmışıq".

Daha sonra klub kart hesabı qoyaraq onlara dəstək olunmasını xahiş edib: "Ona görə sizə müraciət edirik. Açıq və səmimi.

Kim nə qədər bacarırsa... Hətta çox kiçik bir məbləğ də bizim üçün böyük dəstəkdir. İnanın, bəzən xırda bir kömək belə böyük problemi həll edir.

Sadəcə, baxıb keçməyin. Bu komanda hamımızındır. Bu gün bizə dəstək olmasaq, sabah gec ola bilər.

İstəyirik ki, sabah oyuna çıxaq. İstəyirik ki, bu komanda yaşasın".

Qeyd edək ki, qarşılaşma sabah saat 15:00-da Saatlı Olimpiya İdman Kompleksinin stadionunda keçirilməlidir. Hazırda 36 xalla 3-cü yerdə gedən klubun prezidenti Ayaz Abdullayev martın 10-da şəxsi işlərinin çoxluğu səbəbindən vəzifəsindən ayrılıb.