"Mən müqavilə bağladığım "Pafos"da oynayacağam".
Bunu Prosport.Az-a "Neftçi"nin futbolçusu Murad Məmmədov deyib.
Bu gün onun haqda mətbuatda yayılan xəbər Murad Məmmədovun reaksiya verməsinə səbəb olub. 19 yaşlı sağ cinah vingeri ölkə mətbuatında onun "Riqa"ya icarəyə verilməsi ilə bağlı deyilən xəbərin yanlış olduğunu bildirib:
"Mən "Pafos"la müqavilə bağlamışam. Əvvəla, müqaviləmin müddəti 3+1 illik yox, 4 illikdir. Bu ay Braziliyanın "LA Football Consulting" şirkəti ilə müqavilə imzalamışam. "Pafos"a keçidim onların sayəsində baş tutub. Müqaviləmin bütün şərtlərini diqqətlə oxumuşam. Orada "Pafos"dan başqa yerə icarəyə verilməyim nəzərdə tutulmayıb. Nə də ki bu haqda nə azərbaycanlı, nə də braziliyalı menecerim mənə bir söz deməyib. Yeni mövsüm "Pafos" təlim-məşq toplanışına başlayanda, mən də yeni komandamın düşərgəsinə qoşulacağam".
Qeyd edək ki, Murad Məmmədovun "Pafos"a keçəcəyini ilk olaraq idmanxeber.com saytı yayıb.
14:43
Murad Məmmədov Kipr çempionatında oynamayacaq. “Pafos”un yayda heyətinə qatmaq üçün razılaşdığı, ilkin müqavilə bağladığı yarımmüdafiəçi ilə bağlı planlar başqadır.
Prosport.Az futbolinfo.az-a istinadən xəbər verir ki, kiprlilər 3+1 illik müqavilənin bütün detallarında razılığa gəlib. Məmmədovun “Neftçi” ilə anlaşması mövsümün sonunda başa çatacağından, “Pafos” onu sərbəst futbolçu kimi əldə edəcək. Bakılılar yalnız yetişdirmə pulu alacaq ki, o da böyük məbləğ deyil.
Ən maraqlısı Məmmədovun Kiprdə yox, Latviyada oynayacağıdır. “Pafos” futbolçunun “Riqa”nın heyətində oyun praktikası qazanmasını istəyir. Yalnız bundan sonra o, Kiprə yollanacaq.
Məmmədovun transfer edilərək son Latviya çempionu “Riqa”ya icarəyə verilməsi təsadüfi deyil. Çünki hər iki klubun sahibi eyni adam – Roman Dubovdur. Bu şəxs əvvəllər İngiltərədə “Portsmut” və “Ridinq”in prezidenti olub. Yəni bu klubların hamısı Dubov üçün əlçatandır. O müxtəlif ölkələrdən istedadlı oyunçuları toplayıb müxtəlif klublara yerləşdirir, daha sonra isə satır. Murad Məmmədovun yolunun İngiltərəyə qədər uzanması onun özündən, özünü doğrultmasından asılı olacaq.