Azərbaycan Premyer Liqasının XXV turunun “Sabah” – “Sumqayıt” oyunundan (3:1) sonra meydan sahibi komandanın baş məşqçisi Valdas Dambrauskas jurnalistlərin suallarını cavablandırıb.

Prosport.Az xəbər verir ki, mütəxəssis əvvəlcə görüşlə bağlı fikirlərini bölüşüb.

– Komandamı, məşqçilər heyətini, azarkeşləri, rəhbərliyi təbrik edirəm. Bilirdik ki, asan oyun olmayacaq. Ola bilər ki, futbolçuların düşüncəsi fasilədə olsun. Lakin deyə bilərəm ki, oyunçularımın davranışından, köklənməsindən çox məmnun qaldım. İlk hissədə 1:0 öndə olanda çoxlu qol fürsətlərimizdən yararlana bilmədik. 2-ci hissəyə sürətli başladıq və fərqləndik. Bundan yararlanmağa başladıq. Hesab 3:0 olanda nəzarəti itirdik və son dəqiqədə lazımsız qol buraxdıq. Geniş baxsaq, deyə bilərəm ki, bugünkü oyundan razı qaldım. Futbolçulara istirahət veriləcək. Onlar istirahətlərini düşünməlidir. Qayıdandan sonra gümrah olmalı və çempionatın önəmli, son hissəsinə hazırlaşmalıyıq.

– Qarşıda 13-14 günlük fasilə var. Fiziki formanın itməməsi üçün hansısa işlər görüləcək?
– Bu müddətdə xüsusi təlimat olmayacaq. Onlardan 3-4 günlük futbolu unutmalarını istəyirəm. İnanıram ki, yaxşı formadayıq və hazırıq. Dönərkən də hazır olacaqlar.

– Özünüz futbolu unuda biləcəksiniz? 
– Futbolu bir az düşünməyəcəyəm. Amma qayıdandan sonra düşünməyə başlayacağıq. Açığı, fasilənin olmasını istəməzdim. Çünki ritmdən uzaqlaşma olur. Bəzən oyunçuları itirə bilirik. Qayıdandan sonra düşünürəm ki, “Qarabağ”la oyuna yaxşı hazırlaşa biləcəyik.

– Sirr deyilsə, harda istirahət etməyi düşünürsünüz?
– Litvaya qayıdacağam.