"Araz-Naxçıvan" Azərbaycan Premyer Liqasının XXV turunda səfərdə "Şamaxı"nı 1:0 hesabı ilə məğlub edib.

Prosport.Az xəbər verir ki, qonaqların baş məşqçisi Andrey Demçenko matçdan sonra keçirilən mətbuat konfransında jurnalistlərin suallarını cavablandırıb.

- Fasilədən əvvəlki 2 oyunda məqsədimiz 6 xal toplamaq idi. Buna nail olduq. Komandamı təbrik edirəm. İlk hissədə qol epizodlarımız oldu, oyuna nəzarət edirdik. Bu, o deməkdir ki, artıq komandada nəsə var. 2-ci hissənin sonlarında isə o qədər də yaxşı təsir bağışlamadıq. Rəqib uzun toplarla oynamağa başladı və bizdə problemlər üzə çıxdı. Oyun heç-heçə də ola bilərdi. Komandam müdafiədə yaxşı oynadı. Rəqibi 100 faizli imkanlardan yararlanmağa qoymadılar. Bu gün 2 tam fərqli hissə gördük. 1-ci hissədə daha yaxşı idik. 2-ci yarının ortalarından etibarən isə rəqib üstünlüyü ələ aldı. Bəzən bu cür oyunlar oynamalısan. Nəticə qazanmaq üçün döyüşmək lazımdır.

- Qarşıda milli fasilə olacaq. Bu fasilədən necə istifadə edəcəksiniz?

- Futbolçulara 3-4 gün istirahət verəcəyik. Bundan sonra isə hazırlaşmaq üçün vaxtımız olacaq. Qarşıda bizi "Sabah" və "Neftçi" ilə çətin oyunlar gözləyir. Planımızda yoxlama oyunu keçirmək də var.

- Əsas qapıçınız kimdir?

- Kim hazırdırsa, ona şans veririk.