Gəncə Şəhər Stadionu 3 illik fasilədən sonra Azərbaycan Premyer Liqasının oyunlarını qəbul etməyə hazırlaşır.

Prosport.Az publika.az-a istinadən xəbər verir ki, "Kəpəz" klubu yenidən inşa edilən və artıq müasir tələblərə cavab verən idman qurğusuna maydan etibarən qayıda bilər. Ötən il MDB Oyunları kimi nüfuzlu yarışın açılış və bağlanış mərasimlərini qəbul edən arenada yeni təbii ot örtüyü salınır. Qazonun may ayına hazır olacağı planlaşdırılır.

Ot örtüyü ilə bağlı planlaşdıran işlər vaxtında başa çatarsa və aidiyyəti qurumlardan - AFFA və Peşəkar Futbol Liqasından müsbət cavab alınarsa, Premyer Liqanın sonuncu - XXXIII turunun "Kəpəz" - "Neftçi" matçı Gəncə Şəhər Stadionunda keçirilə bilər. Bu qarşılaşma təsadüfi seçilməyib. Komandaların prinsipial rəqib olması ilə yanaşı, görüşün vaxtı belə plan qurulmasına imkan verir.

Qarşılaşmanın təsadüf etdiyi tarixlərdə adətən ölkə ərazisində əlverişli hava şəraiti hökm sürür ki, bu da qazonun tam hazır olmasına şərait yarada bilər. Eyni zamanda, ot örtüyündə hər hansı problem aşkarlanarsa, yeni mövsümün startına qədər aradan qaldırılması mümkün olacaq.

Həmin matçdan sonra Azərbaycan milli komandasının UEFA Millətlər Liqasındakı oyunlarından birinin və avrokuboklara vəsiqə qazanacağı təqdirdə "Turan Tovuz"un ev oyunlarını Gəncə Şəhər Stadionunda keçirməsi gözlənilir.