Avropanın milli çempionatlarında mövsümün sürpriz nəticələri ilə bağlı araşdırma aparılıb.

Prosport.Az xəbər verir ki, gözlənilməz nəticələrin qeydə alındığı liqalar arasında Azərbaycan Premyer Liqası da göstərilib.

“Qarabağ”ın UEFA Çempionlar Liqasında parlaq mövsümü müqabilində çempionatdakı nəticələri sürpriz kimi qələmə verilib.

“Payızda “Qarabağ” dünya futbol azarkeşlərinin diqqət mərkəzinə düşmüşdü. Komanda Çempionlar Liqasında uğurlu çıxış edərək “Benfika”, “Kopenhagen” və “Ayntraxt”a qalib gəlib, “Çelsi” ilə heç-heçə edib və pley-off mərhələsinə yüksəlib. Lakin Avropa arenasındakı uğurlarla paralel olaraq ölkə çempionatında müəyyən geriləmə baş verib. 2 cəbhədə mübarizə aparmaq komandanın nəticələrinə təsir göstərib”, – deyə məqalədə yazılıb.

Bu mövsüm Ağdam klubunun uğurlu seriyasına “Sabah”ın son qoymağa yaxın olduğu vurğulanıb: “Son 12 mövsümdə “Qarabağ” yalnız 1 dəfə – 2020-21 mövsümündə çempionluğu əldən verib. Bu mövsüm isə çempionluğa əsas namizəd “Sabah”dır. “Qarabağ” 5 ildən sonra çempionluğu itirmək riski ilə üzləşib”.

Bundan başqa, Polşada “Zaqlebye”nin zirvədə qərarlaşması, “Legiya”nın təhlükəli zonaya yaxın olması, Şotlandiyada “Seltik” və “Reyncers”in deyil, “Harts”ın turnir cədvəlinə başçılıq etməsi, Niderlandda “Ayaks”ın lider PSV-dən 20 xaldan çox geri qalması, İsveçrədə “Tyun”un hegemonluğu, Danimarkada “Kopenhagen”in ilk “6-lıq”dan uzaq düşməsi, Bolqarıstanda “Ludoqorets”in ardıcıl 14 çempionluq seriyasının son qoyulmaq üzrə olması və Rumıniyada “Styaua”nın son 16 ilin ən uğursuz nəticələrini göstərməsi də mövsümün sürprizləri kimi göstərilib.