Bu mövsümün sonu bir neçə futbolçunun "Qarabağ"ı tərk edəcəyi gözlənilir.

Posport.Az qol.az-a istinadən xəbər verir ki, Kris Kuakunun gedişindən sonra siyahıda daha 6 futbolçunun adı var.

Bunlar qapıçı Mateuş Koxalski, mərkəz müdafiəçiləri Bəhlul Mustafazadə, Sami Mmae, yarımmüdafiəçilər Aleksey Kaşşuk, Emmanuel Addai və hücumçu Ramil Şeydayevdir.

UEFA Çempionlar Liqasında uğurlu oyunu ilə seçilən Koxalskiyə vətəni Polşadan və Avropanın bir neçə klubundan, Mustafazadəyə Çinin "Şençjen Penq Siti" komandasından real təkliflər var. Mövsümün sonunda onların satılacağı ehtimalı yüksəkdir. 

Xorvatiyanın "Dinamo" (Zaqreb) klubundan 1 illik icarəyə götürülən Sami Mmaenin müqavilə müddəti başa çatır. İntizam qaydalarını pozduğu üçün əvəzedici heyətə göndərilən oyunçunu baş məşqçi Qurban Qurbanov da artıq komandada saxlamaq istəmir.

Aleksey Kaşşuk, Emmanuel Addai və hücumçu Ramil Şeydayevlə də əməkdaşlıq dayandırılacaq. Xüsusən Kaşşuk və Ramil Şeydayev ümidləri doğrultmadığından özlərinə yeni komanda axtarmalı olacaqlar. Addaiyə gəlincə, onun müqavilə müddəti başa çatır və karyerasını Avropa ölkələrindən birində davam etdirəcəyi gözlənilir.

Lakin istisna deyil ki, siyahıya daha bir neçə ad əlavə olunsun.

Gedənlərin yeri isə doldurulacaq. Hazırda "Qarabağ"ın seleksiya qrupu intensiv futbolçu axtarışındadır və klub tərəfindən bəziləri ilə danışıqlara da başlanılıb.