Azərbaycan Premyer Liqasının XXIV turunda "Neftçi" səfərdə "Qəbələ"ni 3:1 hesabı ilə məğlub edib.

Prosport.Az xəbər verir ki, "Neftçi"nin baş məşqçisi Yuri Vernidub oyundan sonra keçirilən mətbuat konfransında oyun haqda fikirlərini bölüşüb.

Ukraynalı mütəxəssis əvvəlcə dəstəyə görə azarkeşlərə təşəkkür edib: "Maraqlı oyun alındı. "Qəbələ" uduzmağına baxmayaraq, rəqibin oyunu mənim xoşuma gəlir. Hakimliklə bağlı onu deyə bilərəm ki, bu cür davam edərsə, hər şey yaxşı olacaq. Qəbələdə çox gözəl futbol mərkəzi var. Stadion superdir. Məşq üçün də çox gözəl meydançaları var".

Avrokuboklara vəsiqə uğrunda mübarizə mövzusuna da toxunan Vernidub bunları qeyd edib: "Avrokuboklara getməməyimiz faciə olmaz, sadəcə xoşagəlməz hadisə olar. Bir neçə namizəd var. Əlimizdən gələni edəcəyik. Hələ 10 tur qalıb. Uğur bizim əl, ayaq və bədənimizdən asılıdır".

Ötən turda "Turan Tovuz"la matçdan sonra rəqibin baş məşqçisi Qurban Berdiyevlə görüşməsinin Ukrayna mətbuatında xoş qarşılanmamasından da söz açan baş məşqçi məsələyə belə yanaşıb: "Yazılanlar mənə maraqlı deyil. Bilmirəm, Berdiyevin neçə pasportu var. Bildiyim qədərilə o, türkməndir. Şəkillərdə nə qoyduğunu da bilmirdim. Qısası, müharibənin ilk günündə necə idimsə, indi də eləyəm. Kimlər ki, bu barədə yazırlar, desinlər, görək 4 il ərzində nə ediblər? Mənim 60 yaşım var, nə qədər istəsələr, provokasiyaya cəlb etsinlər. Mən futboldayam və işimə davam edirəm".