"Araz-Naxçıvan" Azərbaycan Premyer Liqasının XXIV turunda doğma meydanda "Karvan-Yevlax"ı 2:1 hesabı ilə məğlub edib.

Prosport.Az xəbər verir ki, Naxçıvan klubunun baş məşqçisi Andrey Demçenko oyundan sonra keçirilən mətbuat konfransında jurnalistlərin suallarını cavablandırıb.

- 3 xal qazandıq. Bu, çox yaxşıdır. İlk hissə bizim üçün yaxşı oldu. Yaxşı qollar vurduq. 2-ci hissədə buraxdığımız qol öz səhvimizdən idi. Oyunun sonları bir az gərgin keçdi. “Qarabağ”la oyunla müqayisədə futbolçuların gözündə alov var idi.

- Simakala çox epizod qaçırdı. Əvəzlənəndə aranızda mübahisə oldu. Sirr deyilsə, oynamaq istəməyənlərdən biri də Simakaladr?

- Ad çəkməyəcəyəm. Yaxşı oynamayan oyunçular özləri bilirlər. Simakala hücumçudur, qol vurmalıdır. 

- Nunu Rodrigeşin oyunundan razı qaldınız?

- Bəli, onun yerini dəyişdik. Yaxşı oynadı. 

- Avrokuboklar mübarizəsində olduğunuzu hiss edirsiniz?

- Təbii ki. Günbəgün daha da irəliləyirik. Uşaqlar tapşırıqları daha yaxşı qəbul etməyə başlayırlar. Böyük komandalara qarşı xallar itirdik, amma hədəfimiz avrokuboklardır. Hər qalibiyyət komandaya özgüvən verir. 

- Keyta startda başlamayacaqdı, məcburi oldu. Bolinin zədəsi ciddidir?

- Keytaya şans verdik, yaxşı oynadı. Ayağının yuxarı hissəsində ağrılar hiss etdi. Durumunu sabah biləcəyik.