Azərbaycan Gimnastika Federasiyasının baş katibi vəzifəsində yenə dəyişiklik olub.

Prosport.Az-ın xəbərinə görə, ötən il martın 19-da baş katib təyin olunmuş, martın 26-dan isə bu vəzifəni icra etməyə başlamış Fatimə Şəfizadə postunu tərk edib.

Sözügedən posta isə yenidən Nurlana Məmmədzadə təyin edilib. Bu onun bu federasiyaya 2-ci qayıdışıdır. N.Məmmədzadənin daha əvvəl gənclər və idman naziri müavini vəzifəsinə təyin olunacağı gözlənilirdi. O tez-tez Gənclər və İdman Nazirliyinin tədbirlərində qeyri-rəsmi işçi kimi iştirak edirdi.

Qeyd edək ki, Nurlana Məmmədzadə ilk dəfə Gimnastika Federasiyasında 2017-ci ilin dekabrından indiki gənclər və idman naziri Fərid Qayıbovu bu postda əvəzləyərək baş katib işləməyə başlayıb. O, ötən ilin fevralın 21-də vəzifəsindən ayrılıb. Onu da ilk dəfə Prosport.Az saytı ictimaiyyətə çatdırıb.