“Sabah”ın qapıçısı Stas Pokatilovun ölkəsi Qazaxıstana qayıtmaq variantı olub.

Prosport.Az yerli mətbuata istinadən xəbər verir ki, “Aktobe” qış fasiləsində 33 yaşlı qolkiperin xidmətində maraqlı imiş. Bunu klubun idman direktoru Marat Xayrullin də təsdiqləyib. Lakin klub rəsmisi qolkiperlə danışıqların mənfi nəticələndiyini etiraf edib.

O, Pokatilovun “Sabah”da qalmağı üstün tutduğunu söyləyib: “Qapı xəttinə namizədlərimiz var idi. Şəxsən mən Stas Pokatilovla danışıq apardım. Ancaq o, Azərbaycanda çıxış edir, müqaviləsi davam edir və “Sabah”ın kapitanıdır. Bu səbəbdən Aleksandr Zarutski ilə danışıq apararaq razılığa gəldik”.

Qeyd edək ki, Stas Pokatilov daha əvvəl 2015 və 2022-2023-cü illərdə “Aktobe”nin formasını geyinib. Qazaxıstan millisinin qolkiperi ötən ilin əvvəlindən “Sabah”ın şərəfini qoruyur.