Azərbaycan Premyer Liqasının XXIII turunun “Neftçi” – “Turan Tovuz” oyunundan (0:1) sonra qonaq komandanın baş məşqçisi Qurban Berdiyev jurnalistlərin suallarını cavablandırıb.

Prosport.Az xəbər verir ki, mütəxəssis əvvəlcə görüşlə bağlı fikirlərini bölüşüb.

– Hər 2 tərəf yaxşı oyun göstərdi. Sevinirəm ki, bu gün qələbə qazandıq. Fikirləşirəm ki, oyunçularım qələbəni haqq edirdi.

– Bu qələbə 3-cü yer uğrunda iddianı nə dərəcədə ortaya qoyur?
– Bundan əvvəl də demişdim ki, oyundan-oyuna hazırlaşırıq. Kubok və ya çempionat oyunu olmasının fərqi yoxdur. Turnir cədvəlinə fikir vermirik. Hər şey sonda bilinəcək.

– Öndə olsanız da, İbrahima Vadji oyuna daxil olduqdan sonra Joarlem Santos da meydanda qaldı. Bu, nə ilə bağlı idi?
– Vadji fiziki baxımdan yaxşı durumda olduğu üçün düşündük ki, 2-sini də oynada bilərik.

– “Turan Tovuz” üçün kubok, yoxsa çempionat önəmlidir?

– Heç bir fərqi yoxdur. Hamısı eyni əhəmiyyəti daşıyır.

– “Turan Tovuz” artıq neçə oyundur ki, qol buraxmır. Bu uğurun sirri nədədir?
– Bu suala cavab vermək çətindir. Çünki qapımız qarşısında təhlükəli epizodlar olur. Əgər olmasaydı, başqa məsələdir. Bu da onu göstərir ki, işləməli olduğumuz məqamlar çoxdur.

– Çempionluq hədəfiniz qalır?
– Hər dəfə mətbuat konfranslarında eyni şeyi deyirəm. Biz yalnız qarşıdakı oyuna hazırlaşırıq.