Azərbaycan Premyer Liqasının XXIII turunun “Zirə” – “Kəpəz” oyunundan (2:2) sonra meydan sahibi komandanın baş məşqçisi Rəşad Sadıqov jurnalistlərin suallarını cavablandırıb.

Prosport.Az xəbər verir ki, mütəxəssis əvvəlcə görüşlə bağlı fikirlərini bölüşüb.

– Oyun bizim üçün yaxşı başladı. Erkən qol vurduq. Ondan sonra da yaxşı epizodlarımız oldu. Şanslardan yararlana bilmədik. Rəqib standart vəziyyətlərdən fərqləndi. Çoxsaylı hücumlar etdik, daha çox oyuna nəzarət edən tərəf idik. Hesabın da təsiri var idi. Rəqib irəlidə idi və müdafiəyə çox diqqət edirdi. Mövsümboyu belə oyunlar olur. Yaxşı epizodlardan vaxtında istifadə edə bilmirsən və rəqib standartlardan istifadə edir. Oyunöncəsi də bu haqda danışmışdıq. Bu qədər çətinliyə baxmayaraq, 1 xal da pis deyil.

– Bu gün 1 xal qazandınız, ya 2 xal itirdiniz?
– Hamımız 3 xala köklənmişdik. “Kəpəz”in son turlardakı çıxışını görmüşdük. Yaxşı oynayırlar. 3 xal istəyirdik, amma gedişat elə oldu ki, 1 xal qazandıq.

– Oyunun sonlarında gəncəli azarkeşlər sizə qarşı şüarlar səsləndirirdi…
– Eşitmirdim, maraqlı deyil. Çempionatda 2 komanda liderlik, 5 komanda avrokuboklar uğrunda mübarizə aparır. Həmin 5 komandada yerli məşqçi yalnız mənəm. Sadəcə bunu qeyd etmək istəyirəm.