“Maraqlı və bolqollu qarşılaşma oldu. Belə oyunlara ehtiyacımız var idi ki, bir-birimizi daha yaxşı hiss edək. Əsas olan qələbə idi".

Prosport.Az xəbər verir ki, bu sözləri “Qarabağ”ın hücumçusu Musa Qurbanlı Azərbaycan Premyer Liqasının XXIII turunda “Araz-Naxçıvan”ı 6:0 hesabı ilə məğlub etdikləri oyundan sonra jurnalistlərə açıqlamasında deyib.

Futbolçu performansım hələ də onu tam qane etmədiyini bildirib: "Üzərimdə işləməli olduğum çox məqam var. Amma nə qədər çox oynasam və komandaya fayda versəm, bu, məni bir o qədər sevindirər. Hələlik çalışıram ki, öz işimi görüm, üzərimdə işləyim və komandaya daha çox fayda verim. Xarici klublara gedişimlə bağlı hələ heç bir danışıq və ya konkret fikir olmayıb. Gələcəkdə nə olacağını zaman göstərəcək".

O, məqsədinin “Qarabağ”ın əsas heyət üzvlərindən birinə çevrilmək olduğunu vurğulayıb: "Hər bir futbolçunun məqsədi ilk “11-lik”də meydana çıxmaqdır. Mənim də futbolçu kimi məqsəd və prinsiplərim budur ki, yaxşı formaya düşüm, komandaya daha çox fayda verim və əsas oyunçulardan biri olum. Düşünürəm ki, daha çox əziyyət çəkərək məqsədimə doğru irəliləyə bilərəm”.

Qeyd edək ki, Musa Qurbanlı daha əvvəl İsveçin "Yuroqrden" klubunda legioner həyatı yaşayıb. Həmin dövr futbolçu üçün uğursuz alınıb.