Azərbaycan millisinin hücumçusu Mahir Emrelinin çıxış etdiyi “Kayzerslautern” klubu Almaniya 2-ci Bundesliqasında XXV tur oyununa çıxıb.

Prosport.Az xəbər verir ki, komanda səfərdə turnir cədvəlindəki rəqiblərindən olan “Boxum”un qonağı olub.

Gərgin keçən qarşılaşma meydan sahiblərinin 3:2 hesablı qələbəsi ilə başa çatıb. Zədədən sonra son 2 matçda meydana qısa müddət də olsa çıxmış Mahir Emreli bu görüşdə də iştirak şansı qazanıb. Azərbaycanlı forvard matçın 83-cü dəqiqəsində ehtiyat oyunçular skamyasından meydana daxil olub. O, yarımmüdafiəçi Marlon Ritanı əvəzləyib. Lakin onun oyunda olduğu qısa müddət ərzində hesab dəyişməyib.

Qeyd edək ki, bu məğlubiyyətdən sonra “Kayzerslautern” çempionatın turnir cədvəlindəki mövqeyini yaxşılaşdırmaq şansını növbəti turlara saxlayıb. Komanda hazırda 37 xalla 7-ci sıradadır.