Sabah Azərbaycan Premyer Liqasında XXIII tura start veriləcək.

Prosport.Az xəbər verir ki, 4 günü əhatə edəcək turu 4 futbolçu cəza ucbatından buraxmalı olacaq.

“Sumqayıt”ın yarımmüdafiəçisi Nikola Ninkoviç “Karvan-Yevlax”la açılış matçında yer almayacaq. Buna səbəb serbiyalı oyunçunun ötən turda “Kəpəz”lə görüşdə qırmızı vərəqə alması olub.

Çempionluğa iddialı “Qarabağ” da “Araz-Naxçıvan” önünə tam heyətlə çıxa bilməyəcək. Çünki müdafiəçi Mateus Silva məşqçilər korpusunun sərəncamında olmayacaq. “Sabah”la qarşılaşmada mövsümdə 4-cü sarı vərəqəsini alan braziliyalı cinah müdafiəçisi bununla cəzalı duruma düşüb. Onun həmyerlisi olan Kadinin 2 oyunluq cəzası da bitməyib.

“Neftçi”də isə müdafiəçi Mustafa Sek “Turan Tovuz”la görüşü kənardan izləməli olacaq. O da ötən turda “Şamaxı” ilə matç zamanı mövsümdə 4-cü sarı vərəqəsini alaraq limiti doldurub.