Azərbaycan Kubokunun 1/4 final mərhələsinin “Kəpəz” – “Turan Tovuz” oyunundan (0:2) sonra meydan sahibi komandanın baş məşqçisi Azər Bağırov jurnalistlərin suallarını cavablandırıb.

Prosport.Az xəbər verir ki, mütəxəssis əvvəlcə görüşlə bağlı fikirlərini bölüşüb.

– Azarkeşlərə təşəkkür edirəm ki, məğlub olmağımıza baxmayaraq, komandanı dəstəklədi. Neçə oyundur, təhlillər aparırıq, yenə standart vəziyyətlərdən qol buraxırıq. Bu, adamı üzür. Növbəti oyunumuza hazırlaşacağıq. Çalışacağıq ki, ən yaxşı oyunlarımızdan birini keçirən. Belə məğlubiyyətlər adamı üzür. Standartlara hazırlıqda çox iş qapıçı məşqçisinin üstünə düşür. Nə deyim… Baxacağıq, çalışacağıq ki, çempionatda yuxarı qalxaq.

– Azarkeş dəstəyindən danışdınız. Amma ilk hissənin sonlarında fanatlar oyundan çox narazı qalmışdı…
– Normaldır. Bu, komandanı ayıltmaq kimi bir şeydir.

– Ohorinin zədəsi ciddiyə oxşayır.
– Həkimlər çox ciddi demədi. MRT müayinəsindən sonra bilinəcək. Burxulma oldu, şükürlər olsun, dartılma yoxdur.

– Kubokla vidalaşmağınız gözlənilən idi. Çempionatda da yerinizi qorumuş kimi görünürsünüz. Azarkeşlər daha iddialı komanda görmək istəyir. Gələn mövsümlə bağlı nə düşünürsünüz?
– Komandanı sıfırdan mən yığmamışdım. Çempionatda ən çox yerli, ən az legioner bizdədir. Bu saylarda böyük ölçüdə uduzuruq. Mövsümün əvvəlindən balans məsələsi darmadağın oldu. Bir neçə oyunçu heç nədən getdi. Bu, böyük zərbə oldu. Bunun altından hansı vəziyyətlə çıxdığımızı bilirsiniz. Uşaqlar maksimum hazırlaşır. Bugünkü oyunu da pis adlandırmazdım. Epizodlarımız oldu, rəqibə təzyiq edə bildik, pressinqlərimiz var idi. Sadəcə standart vəziyyətlərdən qol buraxanda ruh düşkünlüyü yaşanır. Bu uşaqlarla sona qədər davam edəcəyik. Komandada qalıb-qalmayacağımız sonra məlum olacaq.

– Rəhbərliklə danışmısınızmı?
– Hər şeyə mayda aydınlıq gələcək.

– Qalmağınız sizdən, ya klub rəhbərliyindən asılıdır?
– Hər şey rəhbərlik və məşqçinin fikirlərinin üst-üstə düşməsiylə bağlıdır. Əlbəttə, komandanı özüm yığsam, Gəncədə qalmaq mənim üçün asan olar.

– Söhbətlər var ki, rəhbərlik dəyişəcək. Bu, komandada sıxıntı yaradır?
– Xeyr. Peşəkar futbolçu belə şeylərə fokuslanmır. Hər şeyimiz qaydasındadır. Maaş, mükafat… Hər şey təmin olunursa, futbolçu da maksimum hazırlaşmalıdır.