Belarus mətbuatı heç vaxt dünya və ya Avropa çempionatının final mərhələsinə vəsiqə qazana bilməyən ölkələrdən danışarkən, Azərbaycan milli komandasından da bəhs edib.

Prosport.Az xəbər verir ki, onliner saytı  milli komandamız barədə bunları yazıb:

"Qazaxıstanda olduğu kimi, maliyyə yardımları Azərbaycan klub futbolunun inkişafına kömək edib. “Qarabağ” son illərdə Avropa yarışlarında müntəzəm olaraq iştirak edir və bu mövsüm Çempionlar Liqasında böyük uğur qazanıb. Lakin bu, milli komandaya heç bir fayda gətirməyib. Azərbaycan üçün seçmə mərhələdə cəmi bir qələbə artıq uğur hesab olunur. Lakin komanda heç vaxt dünya və ya Avropa çempionatının final mərhələsinə yaxınlaşmayıb.

Hətta ulduzların dəvəti də onlara kömək etməyib. 2024-cü ildə milli komandaya Portuqaliya ilə AVRO-2016-nı qazanan və bundan əvvəl zəif Yunanıstanı çempionatın pley-off mərhələsinə aparmış Fernandu Santuş rəhbərlik edib. Məşqçi, əlbəttə ki, Kriştianu Ronaldonu və onun komanda yoldaşlarını da özü ilə gətirə bilməyib. Nəticə də yaxşı olmadı. 11 matçda (onlardan biri Belarusla yoldaşlıq oyunu) 9 məğlubiyyətdən sonra 70 yaşlı məşqçi postundan çıxarıldı".