"Qarabağ" kapitanı Bədəvi Hüseynovla yeni müqavilə imzalayacaq.

Prosport.Az xəbər verir ki, bu barədə klubdan sportinfo.az-a məlumat verilib.

Bildirilib ki, o, karyerası ilə bağlı bütün söz-söhbətlərə son qoyub. 34 yaşlı mərkəz müdafiəçisi butslarını mıxdan asmaq fikrindən daşınıb.

Hüseynov ən azı daha 1 il yaşıl meydanlarda top arxasınca qaçmaq qərarına gəlib. 2027-cı ilin yayında isə məşqçilik həyatına atılacaq.

"Anji"nin yetirməsi 2013-cü ildən Ağdam klubunun formasını geyinir. Millimizin sabiq üzvü "köhlən atlar"ın düşərgəsinə gələnədək 2 il "Sumqayıt"ın uğurları üçün tər töküb.

Onun "Qarabağ"la müqavilə müddəti bu ilin yayında başa çatacaq. Təcrübəli arxa xətt oyunçusu yekun fikrini məşqçilər korpusunun diqqətinə çatdırıb və razılıq alıb.

Qeyd edək ki, Bədəvi Hüseynov 2 mövsümdür ki, burada əsas heyət üzvü sayılmır. O, ötən müddətdə tez-tez zədə aldığı üçün ilk "11-lik"dəki yerini itirib.