"Bu gün qol imkanlarımız oldu. Sadəcə olaraq onları vura bilmədik. Rəqib bir dəfə də qapımıza zərbə endirə bilmədi. Amma biz bu gün 2 xal itirdik".

Prosport.Az xəbər verir ki, bu sözləri "Turan Tovuz"un baş məşqçisi Qurban Berdiyev Azərbaycan Premyer Liqasının XXII turunun "İmişli" ilə oyunundan (0:0) sonra keçirilmiş mətbuat konfransında deyib.

O, jurnalistlərin suallarını da cavablandırıb.

- Coş Ginelli və İbrahima Vadjinin CV-si yaxşıdır. Onların meydanda sizə xeyir verməsi üçün nə qədər zamana ehtiyac var?

- Məşqlərdə bunun üzərində işləyirik. Fikirləşirəm ki, oyunlarda problemi aradan qaldıracağıq.

- Qarşıda kubokda "Kəpəz" və çempionatda "Neftçi" ilə oyunlar var. Qısa müddətdə 2 ağır oyuna çıxmaq nə dərəcədə futbolçuları yora bilər?

- Futbolçuların fiziki vəziyyətləri qaneedicidir. Kubok matçına hazırlaşacağıq.

- Aleks Souzanı mövsümün sonuna qədər saxlayıb, daha sonra transferinə icazə vermək olmazdı?

- Xeyr, belə düşünmürük. Haqlı olaraq belə qərar vermişik.