Qış fasiləsindən sonra işləri yağ kimi gedən "Neftçi" növbəti oyuna hazırlaşır.

Prosport.Az sportinfo.az-a istinadən xəbər verir ki, “Qarabağ”la matç təxirə salındığı üçün XXI turda istirahət edən paytaxt təmsilçisi bu həftə Şamaxıda eyniadlı komandanın qonağı olacaq.

Bölgə təmsilçisi ilə matçdan əvvəl Yuri Vernidub 2 legionerə xəbərdarlıq edib. Söhbət seneqallı sol cinah müdafiəçisi Mustafa Seklə fransalı dayaq yarımmüdafiəçisi Sessi DAlmeydadan gedir.

Hər 2 futbolçu sarı vərəqə limitindədir. Yəni, geridə qalan oyunlarda hərəsi 3 sarı vərəqə almaqla cəzalı duruma yaxınlaşıb. “Şamaxı” ilə dueldə hakimin növbəti “sarı” üzünə tuş gələcəkləri halda, XXIII turda “Turan Tovuz”la həyati əhəmiyyətli oyunda iştirak etməkdən məhrum olacaqlar.

Bu isə heç bir halda ukraynalı çalışdırıcını razı sala bilməz.

Qeyd edək ki, fevralın 28-də keçiriləcək “Şamaxı” – “Neftçi” görüşü saat 14:30-da başlayacaq.