“Qarabağ” bu mövsüm UEFA Çempionlar Liqasında sol ayaqla ən çox qol vuran komandalar sırasındadır.

Prosport.Az xəbər verir ki, Ağdam təmsilçisi Liqa və pley-off mərhələsində rəqib qapılarına 16 dəfə yol tapıb ki, futbolçular bunun tən yarısını sol ayaqla vurublar.

Azərbaycan çempionu bu statistik göstəriciyə görə, “Atletiko”, “Barselona” və Dortmund “Borussiya”sı ilə 2-ci yeri bölüşür. Lider isə sol ayaqla 10 qola sevinən PSJ-dir.

Ancaq digər tərəfdən Azərbaycan çempionu “ikinci mərtəbə”dəki zəif çıxışı ilə yadda qalıb. Təsadüfi deyil ki, Qurban Qurbanovun yetirmələri başla qol vura bilməyən 6 komandadan biridir. PSV, Marsel “Olimpik”i, “Atletik”, “Ayaks” və “Slaviya”nın da futbolçuları hücum zamanı hava mübarizəsində rəqib müdafiəçilərini üstələyə bilməyiblər.

Turnirdə ən çox cərimə zərbəsi yerinə yetirən komanda isə məhz “Qarabağ” olub. Təmsilçimiz 10 oyunda ümumilikdə 148 dəfə kobudluğa məruz qalaraq, cərimə zərbəsindən topu oyuna daxil edib. İkinci pillədəki “İnter”in aktivində 145 cərimə zərbəsi olub. İlk “üçlüy”ü isə “Borussiya” (128) qapayıb.

Azərbaycan çempionunun oyunçuları 10 görüşdə ümumilikdə 151 dəfə driblinqə əl atıblar. Bu siyahıda isə çempionumuz 7-ci pillədədir. Lider “Real”da bu say 211-ə bərabərdir.

“Qarabağ” turnir zamanı etibarlı müdafiə xətti ilə də fərqlənib. Komanda 219 dəfə topu rəqib oyunçulardan “oğurlayıb”. Ölkə çempionu bu baxımdan 4-cü sıradadır. Lider “Bodo Qlimt” isə 266 uğurlu müdaxilə ilə siyahıya başçılıq edir.

Bütün oyunlarda ağdamlıların qapısını qoruyan Mateuş Koxalski ümumilikdə 45 qurtarış sayəsində yalnız 3 həmkarından geri qalır. “Bodo Qlimt” (56), “Real” (49) və “Kayrat” (47) ilk “üçlüy”ün sakinləridir.

Qeyd edək ki, Çempionlar Liqasında “Qarabağ” pley-offda “Nyukasl”a məğlub olaraq mübarizəni dayandırıb.