“Qarabağ”ın fərqi kollektivdədir. Çox güclü və təvazökar bir qrupumuz var. Qaçmaq lazım olanda qaçırıq, müdafiə olunmaq lazım olanda müdafiə olunuruq. Bu uğurda hər detalın payı var. Hər gün 1 faiz daha yaxşı olmağa çalışırıq. 1 oyunu qazanırsan, özünəinam artır, sonra digərini qazanırsan… Futbolda uğurun konkret formulu yoxdur. Şükürlər olsun ki, bizdə hər şey yaxşı gedir”.

Prosport.Az xəbər verir ki, bu sözləri "Qarabağ"ın braziliyalı müdafiəçisi Dani Bolt ölkəsinin mətbuatına açıqlamasında deyib.

Futbolçu ona "Bolt" ləqəbinin verilməsindən danışıb: "Bolt” adı burada da müzakirə mövzusu oldu. Bir çox insan bununla bağlı sual verirdi. Mən də izah etdim ki, sürətimə görə belə çağırırlar, onlar üçün tərcümə etdim. Amma mənim üçün fərqi yoxdur, istər Daniel, istərsə də Bolt desinlər”.

O, "Qarabağ"ın Çempionlar Liqasındakı çıxışını da dəyərləndirib: "Bu, “Qarabağ”ın Çempionlar Liqasındakı ikinci iştirakıdır və komanda artıq mühüm nəticələr əldə edib. Bu, məqsədlərin reallaşması hissidir. Hər bir gənc futbolçu karyerasına başlayanda arzularından biri Çempionlar Liqasında oynamaq olur — bu, dünyanın ən nüfuzlu klub turniridir. Əlbəttə, bu səviyyəyə çatmaqla kifayətlənmirik, daim daha artığını istəyirik. Amma belə böyük komandalar və oyunçulara qarşı çıxış etdiyimiz üçün çox məmnunuq”.

Bu gün Çempionlar Liqasının pley-off mərhələsində "Nyukasl"a qarşı keçirəcəkləri cavab oyununa da toxunan Bolt vəziyyətə realist yanaşır: “Bilirdik ki, bu, çox çətin sınaq olacaq. Dünyanın ən güclü çempionatlarından birində çıxış edən böyük komandaya qarşı oynayırıq. Amma gözləntilərimiz müsbətdir. Təkcə futbolda yox, həyatda da nəzarət edə bildiyimiz məsələlərə fokuslanmalıyıq. Bizim edə biləcəyimiz ən yaxşı 90 dəqiqəni keçirməkdir. Nə olacaqsa, olacaq — daha yaxşı oynayan tərəf mərhələ adlayacaq”.