UEFA Çempionlar Liqasının pley-off mərhələsində “Qarabağ” üzərində Bakıdakı qələbə “Nyukasl”ın baş məşqçisi Edi Haunun istefasına mane olub.

Prosport.Az Britaniya mətbuatına istinadən xəbər verir ki, İngiltərə klubu 48 yaşlı mütəxəssislə yolları ayırmaq qərarını təxirə salıb.

Komandanın son vaxtlardakı uğursuz nəticələri rəhbərliyi yeni çalışdırıcı axtarışına vadar edib. Xüsusən də Premyer Liqadakı nəticələrlə komanda işini çətinə salıb. Lakin “Qarabağ” üzərində Bakıda böyükhesablı qələbə qazanan “Nyukasl” 1/8 final mərhələsinə vəsiqəni demək olar ki, rəsmiləşdirib.

Bu gün Nyukaslda baş tutacaq cavab qarşılaşmasını formal saymaq olar. Məhz bu amil Haunun daha bir müddət komandada qalmasına imkan yaradıb. Lakin rəhbərlik uğursuz nəticələr davam edəcəyi təqdirdə mövsüm bitməmiş baş məşqçi dəyişikliyi etməkdən çəkinməyəcək. Hazırda alternativ namizədlərlə danışıqlar aparılır.

Qeyd edək ki, bu gün “Sent Ceyms Park”da keçiriləcək “Nyukasl” – “Qarabağ” oyunu Bakı vaxtı ilə saat 00:00-da başlayacaq. Bakıdakı ilk matçda qonaqlar 6:1 hesablı qələbə qazanıb.