PSJ klubunun qapıçısı Luka Şevalye oyun praktikasının çatışmazlığı səbəbindən Fransa milli komandasının dünya çempionatı üçün nəzərdə tutulan yekun heyətindən kənarda qala bilər.

Prosport.Az yerli mətbuata istinadən xəbər verir ki, 24 yaşlı qolkiperin Paris təmsilçisinin son oyunlarında ehtiyat oyunçular skamyasında qalması və Matvey Safonovla rəqabətdə əsas heyətdəki yerini itirməsi milli komandanın məşqçilər heyətində ciddi narahatlıq yaradıb.

Əgər Şevalye yaxın müddətdə klubundakı statusunu dəyişə bilməsə, onun martda keçiriləcək toplanışa dəvət almaq şansları minimuma enəcək.

Vəziyyətin ciddiliyini nəzərə alan millinin qapıçılar üzrə məşqçisi Frank Ravio artıq alternativ namizədləri nəzərdən keçirməyə başlayıb. Hazırda İtaliyanın “Komo” klubunda çıxış edən Jan Büte və “Lans”ın qolkiperi Roben Rissye yaxından izlənilən əsas namizədlər sırasındadırlar.

Qeyd edək ki, Luka Şevalye Fransa yığmasının heyətində cəmi bir oyun keçirib və o, debütünü məhz DÇ-2026-nın seçmə mərhələsi çərçivəsində Bakıda Azərbaycan millisinə qarşı keçirilən görüşdə (3:1) edib.